Ming Yung Photo係上年日2010年12月13日正式成立，我非常多謝各位客人或者支持者鐘意我的照片，我感謝你對我的支持及鼓勵。係呢個日子我想分享少少，其實我當初係冇念過買相機，一部入門單反。 3年前某一日，我的女朋友話:”不如買部相機玩下囉” 我就答佢：“買咩丫，曬錢！傻瓜機都影得好靚啦。” 估唔到係今日變成左自己的事業！

前幾日，我睇左3 idiots(作死不離三兄弟），我相信大陸會叫三傻仔，我睇到一半，有d鹽水係我的靈魂之窗滲出黎，因為有一個傻仔夢想做一個野生動物攝影師，但因為家人及社會的壓力而去讀一個佢唔鐘意的科目，最後一位超級傻仔逼左佢去追尋自己的理想。回憶起當初，我決定買一部高階d o既相機去做職業攝影的時候，我身邊的朋友話: “買機唔送技術wor！” ，“你識唔識影相嫁?你不如玩多幾年先啦！” 差一步，只係差一小步，我而家就同你一樣，坐係個mon前面睇緊人地d靚相。人生踏出新的一步係唔容易，去尊重自己的夢想有時可能係為勢所迫，如果唔係我的舊公司迫我出黎，都唔會有Ming Yung Photo，所以我係非常明白同尊重真心對侍自己的夢想家！ 請大家俾多d鼓勵，支持佢地的熱誠同堅持，多d留意一下身邊的事物，可能你都有一兩位朋友係背後默默奮鬥緊!